Seite:Briefwechsel Hildebrand Veckinchusen 194.jpg

	Wilhelm Stieda (Hrsg.): Briefwechsel Hildebrand Veckinchusen

ik hebbe de syde wol entfangghen, mer ik en hebbe et noch nicht opghereven, dat komet darby to, dat de vrowen dar nicht gerne an en wellen, nu se so dur is, ik wolde wol, dat wy wat van minre prize hedden. Doch se moten jo syden hebben, mer ik vormode my, dat se boven 5½ mark nicht ghelden en welle, de ik hir hebbe.

Item ik wel gerne in allen dingghen des besten ramen; desgheliken dot gy ok. Wes gy my van deme kopper screven hebben, dat et in Englant gheweghen hevet, dat hebbe ik wol vornomen. Item so hebbe ik her Hinrik Rapesulver ghesecht, alse gy my ghescreven hebben unde he seghede my weder, wo se alrede vuste ghelt van Hamborg overkofft hedden unde wolden darna wesen, dat se des mer overkofften. Item wy en hebben van den 700 ghulden noch nicht 1 ₰. Anders nicht dan blivet ghesunt. Ghescreven 26 daghe in september anno 17.

T. B.

Item, Hildebrant, hir en is noch neine tidinghe ut Lyfflande komen, anders dan alse ik ju wol er screven hebbe, unde dat komet darby to, dat det wint nicht ost en is.

177. Rechnungslegung Gerwin Marschedens für Hildebrand Veckinchusen. – 1417 Dezbr. 17.

Rev. St.-A. Orig. Handschrift in Schmalfolio von 32 Seiten, von denen 6 Seiten unbeschrieben. Auf der letzten Seite hat Hildebrand Veckinchusen’s Hand vermerkt: Int jar 1418, 7 in jannewario, do untfench ick desse rekenschop van Gherwin Marscheden. So my Marschede scryvet, so wes my Marscheden sin mach, dat wyl ick Hildebrant Veckinchusen overseyn, wan ick to Brugge komme by myne poppere. Tom ersten scryvet hey my ick solle by emen beholden ton ersten 746½ marc 50 ₰ Prusch, darto 2 ballen Kommynsche, darto ½ Herentals laken, dadarto noch dat ghelt van den ersten fyghen, darto noch 51 korf fyghen, dey my anroren. Item darto sal emen, ofte God wyl, komen in Gyldemester 2 terlinge laken, in den enen es 18 Herentalsche, in den anderen es 29 Wallemesche halve laken. Hirop sant emen noch 60 korf fyghen unde ok 3 laken edder 2 in Marsscheden terlinge. Item hirop so hevet my Marsscheden gud ghesant unde ok so hebbe op emen koft, dat hey betalt hevet op 384 marc myn 16 ₰ Lub. So wes hey my sant hevet, dat wyset sin rekenschop wol ut, ick desse rekenschop untfench. Int jar 1419 to pinxsten^[1] in Andorper market, do quam my 1 breyf ut Prusen dat hey op my kofft hevet 10 ℔ gr., dey ick untrychten moyt Gosschalk Crouwelle. Aldus so love ick nicht, dat hey noch velle tovoren sin mach, mer doch so stont eme ghelt in schulden unde hey sal my noch al rekenschop scryven, so wes hey hanttert hevet seynt desser rekenschop.

---

1. 4. Juni

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 123. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_194.jpg&oldid=- (Version vom 31.7.2018)