|
Wilhelm Stieda (Hrsg.): Briefwechsel Hildebrand Veckinchusen |
|
|
175. Tideman Brekelvelde (in Lübeck) an Hildebrand Veckinchusen in Brügge. – 1417 Sept. 3.
- Rev. St.-A. Orig. Adr.: An Hildebrant Veckinchusen to Brugge littera detur.
Item, Hildebrant, alse gy my ghescreven hebben, dat ik ju scriven sole, wovele dat de lacke ghelden hevet unde wat dat se weghen hevet, des so wetet, dat se ersten affgheweghen hadden 15 ℔ unde na der tijt, do se al vorkofft wart, do woch de ene hupe 79 ℔ unde de ander hupe woch 41½ ℔ unde 4 lot, unde dat ℔ is ghegeven vor 18 sl. de helffte nu to betalene op unser vrowen dach neghest komende[1] unde de ander helffte op sunte Michel[2]. Item Willem en hefft noch mit alle nein ghelt utghelecht. Ik hebbe ene wol ghesecht, dat gy ghelt op my overkofft hedden, dat he wol dede unde lete my wat gheldes van juwer wegene werden, wante ik en hedde nein ghelt to betalene. He seghede my wol, dat he dat don wolde, mer he en seghede nicht, wanner dat he dat don wolde. Mer wy wellen darna wesen, dat wy dat ghelt entfangghen van der lacken, uns solde anders lancksem betalinghe schein van eme unde wy wellen ene alike wol in maninghe holden. Et sin gude lude, de de varwe kofft hebben.
Item, Hildebrant, alse ik ju ok alrede ghescreven hebbe by dessen sulven boden, dat min gutdunkent is, dat gy ju herwardes maken ume som sake willen, der ik ju nicht scriven en wel noch en kan, mer op eventur were gy unde juwe broder hir op eventur, en dink mochte dan wol bet gheschein, dan et nu don solde. Gy merken wol wen ik meine unde et were umer beter vor uns altomale, dat he hir wonde dan to Dorpmunde. Hir solde gy op denken unde laten som dink na, dat ju unde juwen kinderen nicht so vele inbrenghen en kan, alse ju op eventur dit wol don solde. Dit nemet to herten unde komet herwardes so gy ersten kunnen. Item, Hildebrant, ik hebbe ju alle dink ghescreven in anderen breven. Wes ik vor ju utghegeven hebbe unde ok weder van juwer wegene entfanghen hebbe, des welle wy alle wol ens werden, off Got wel. Mer alse ik ju er screven hebbe, so scrive ik ju noch, dat ik alle dink to juwen dinghe scriven wel. To der tijt, dat gy herkomen, so welle wy dat wol also maken, alzet gotlik unde meghelik is. Anders en beghere ik des seker nicht. Hirmede blivet ghesunt, wante al juwe ghesinne is in guden punten, Deo laus. Hirmede blivet ghesunt. Ghescreven 3 daghe in september anno 17 mitter hast.
176. Tideman Brekelvelde (in Lübeck) an Hildebrand Veckinchusen in Brügge. – 1417 Sept. 26.
- Rev. St.-A. Orig. Adr.: An Hildebrant Veckinchusen to Brugge littera detur. In dorso von der Hand des Empfängers: 1417, 29 in settember.
Vruntlike grote tovorne screven. Wetet Hildebrant, gude vrunt, dat ik juwen breff, ghescreven 3. in September, wol vornomen hebbe, unde
: Briefwechsel Hildebrand Veckinchusen. Leipzig: S. Hirzel, 1921, Seite 122. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_193.jpg&oldid=- (Version vom 31.7.2018)
