|
Wilhelm Stieda (Hrsg.): Briefwechsel Hildebrand Veckinchusen |
|
|
Ludeke Lutterke, wante en deels vrowen weten my to seggene dat he beter kop gheve, dan ik do, unde meinen to eme to ghane.
Item, Hildebrant, so hebbe ik dat paijement al van juwer wegene betalt, dat gy op desse tijt schuldich west hebben hir to betalene unde ik hebbe mer vor ju betalt, dan ik entfanghen hebbe alse ik von juwer wegene al betalt sy summa by 100 unde 30 mark unde ju gheleve to wetene, dat my en deels gheldes van juwen wasse op de wessel by Hans Bussow bewizet wart unde de is en wech, men ik meine, he sole weder by de hant komen unde enen jeweliken vul don. Desse is my schuldich ghebleven by 77 mark, mer ik hope, wy en solen nicht missen. Anders en wet ik ju nicht to scriven dan blivet ghesunt. Ghescreven in sancto die divisio apostolorum anno 17.
Item, Hildebrant, de 40 Arrasch sin noch unvorkofft, alse ju Margrete wol screven hevet unde et is nu ut der tijt to vorkopene, et en were dat men se binnen kopes geven wolde. Ik sprak noch dallink mit Lozekinghe, dat he de mit sick nemen solde to Gripeswolde in dat market.
169. Gerwin Marschede (in Danzig) an Hildebrand Veckinchusen in Brügge. – 1417 Juli 16.
- Rev. St.-A. Orig. Adr.: Dem erbaren manne Hildebrant Veckinchuesen to Bruegge littera detur.
In dorso von des Empfänger’s Hand: Mychel von Gulle ½ tunne; es inne 1000 harwerkes, golt 6 ℔; 18 tymmer harwerkes golt 5 ℔ 12 sl. Item 12 tymmer scevenisse. Das Datum ergibt sich aus den vorhergehenden Briefen.
Item so wetz Hildebrant Veckinchuesen, gude vrent, dat ik jue sende in Mychgel van Gueleke ½ tunne, dar es inne 1000 werkes, dat stet dat timmer 1½ mark unde 18 timmer werkes stan to 2 mark 2 schot, 12 timmer scevenitschen, 1 kannepueas. Item sint hir inne 2 voder, de hort to Tydeman Swarten, de sendet em by Hinryk Garnevelt. Got sy myt jue. Gescreven myt der hast 9 dage vor sunte Jakoppe.
170. Tideman Brekelvelde (in Lübeck) an Hildebrand Veckinchusen in Brügge. – 1417 Juli 24.
- Rev. St.-A. Orig. Adr.: An Hildebrand Veckinchusen to Brugghe littera detur.
Vruntlike grote tovorne screven. Hildebrant, gude vrunt, ju gheleve to wetene, dat ik juwe breve vuste al wol vornomen hebbe. Mer de rekenscop tuschen uns beden de komet jo nicht vort. Ik hebbe dar drade 2 jar ume screven, alse gy wol weten.
Item so scriven gy, dat dar noch neine syde komen en is. Ik wolde wol, dat dar wat queme, wante ik en hebbe nicht mer dan ume trent 5 ℔ syden to vorkopene. Item alse gy scriven, dat gy en deels gheldes ut der selscop
: Briefwechsel Hildebrand Veckinchusen. Leipzig: S. Hirzel, 1921, Seite 117. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_188.jpg&oldid=- (Version vom 31.7.2018)
