|
Wilhelm Stieda (Hrsg.): Briefwechsel Hildebrand Veckinchusen |
|
|
nedderliggen unde alle de gene, de ghekopslaget hebben van dessem winter, de hebben tomale duren kop ghekofft. Dat was hebben se ghebutet umme 27 scot., dat 1000[1] umme gude Tomassche laken unde dat schone werk umme 20 scot. Item so kopen se hir nu dat was umme 33 mark unde den roggen umme 15 mark et is al dure kop, dat men hir hebben sal. Anders en wet ik ju sunderlinge nicht to scriven. Mer ik hebbe, off God wil, willen to Lubeke wart to segelen myt den ersten schepen, alzo verne alz wy gude tidinge vornemen von der se. Ghebedet over my unde grotet myn susteken unde de kinder unde alle vrund sere. Ghescreven des middewekens na sunte Philippi Jacobi anno 1417 jar.
154. Tideman Brekelvelde (in Lübeck) an Hildebrand Veckinchusen in Brügge. – 1417 Mai 14.
- Rev. St.-A. Orig. Adr.: An Hildebrand Veckinchusen to Brugge littera detur.
Vruntlike grote tovorne screven. Wetet, Hildebrant, dat ik de 7 Arrasche entfanghen hebbe unde de lude en wellen er nicht hebben unde seggen, dat de varwe so gut nicht en sy alse gy en ghelovet hadden, unde ok so en weren se so gut nicht alse de ersten. Ik hebbe se en ghelaten to 3 sl. min dan to 8 mark, nochtant so en wellen se er nicht.
Item so hebbe ik de 20 ℔ syden entfanghen, mer ik en hebbe dar noch nicht van vorkofft. Ok so hebbe ik hir noch by 12 ℔ unvorkofft alse ik ju latesten ok screff. Item, Hildebrant, so is hir 1 tunne ghekomen ghemerket mit juwen merke, dar sin Arrasche inne, men wy en weten nicht, wovele unde ok wat de varwe is unde ok wat dat se stan, wante dar en sin neine breve by ghekomen, des uns wunder hevet; hirume so en wete wy nicht, wat wy darby don solen to der tijt dat wy breve hebben.
Item so is juwe was nu ghekomen, dat ju Marschede sant hevet in Ludeken Detmers, doch so en iz et noch nicht opghescheppet unde ik en vorneme noch nicht, dat ju Marschede mer sende, dat my sere vorwundert, wante pinxsten is op 14 daghe na hir, so mot ik de 60 ℔ 5 sl. grote betalen, alse gy wol weten. Got geve, dat uns redinghe kome, dat wy neine maninghe en liden. Ik wel dit wol vorkopen to den schonsten dat ik kan.
Item ik hebbe de 32 ℔ grote overlanck betalt, ok so makede ik Seilhorn over 95½ mark Lub., ok so hebbe ik Crowel ghegeven 9½ mark, alse ik ju ok wol er ghescreven hebbe. Unde dit ghelt quam my umer hastekken uttogevene, er ik darop ghedacht hadde. Doch, Hildebrant, wes ik don kan ume juwen willen, dat wel ik altos gerne don unde en welt anders nicht don, dan ik van ju nemen wel. Sunderlinge en wet ik ju anders nicht to scrivene, dan dat gy des besten ramen in allen dinghen, lik alse gy van my nemen wellen. Wy hebben hir tidinghe, dat gy to Utrecht beseijn weren des midwekens vor
Brugger markete. Ik hope, dat ik binnen kort breve van ju hebben sole
- ↑ Dürfte die Bezeichnung des Pelzwerks ausgelassen sein.
: Briefwechsel Hildebrand Veckinchusen. Leipzig: S. Hirzel, 1921, Seite 173. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_173.jpg&oldid=- (Version vom 31.7.2018)
