Seite:Briefwechsel Hildebrand Veckinchusen 136.jpg

	Wilhelm Stieda (Hrsg.): Briefwechsel Hildebrand Veckinchusen

112. Tideman Brekelvelde (in Lübeck) an Hildebrand und Sivert Veckinhusen in Köln. – 1415 Dec. 22.

Rev. St.-A. Orig. Adr.: An Hildebrand unde Syverd Veckinchusen to Collen littera detur.

Vruntlike grote unde wes ik gudes vormach. Hildebrant ik hebbe juwen breff wol vornomen, den gy to Collen screven hadden unde gy scriven my, dat unse kopper noch unvorkofft were. Hildebrant, dat is my leet ghenoch, dat et also lancksem to ghelde komet unde my dunket, dat des drade wol tiit were, dat et weder to ghelde queme, wante des is alrede alwile dat de laken ghekofft worden unde gy weten wol, dat ik noch vele gheldes tachter sy van unser selscop wegene alse ik ju hirnesten, off Got wel, wol screven wel. Item Tideman Swarte hevet uns rekenscop ghescreven van allen dinggen besunder van deme roden scharlaken unde van deme tymeane. Dit hebbe ik ju wol in anderen breven ghescreven. He hadde an my de rekenscop ghescreven unde screff my, dat ik se ju vort senden solde. Dit hebbe ik ghedan unde hope, dat de rekenscop to Brugge queme, er gy to Collen quemen. Ok hevet he rekenscop screven van deme gronen engwer. Item so scriven gy, wo Zyvert to Costans sy. Got geve, dat he mit leve komen mote. Ik wolde wol, dat he by de hant queme, wante de bose selscop hevet langhe noch ghestan sunder ende darvan to makene. He hevet my vuste ghescreven, dat ik eme rekenscop scriven sole unde maken alle dink hir slecht. Dat dede ik gerne, weste ik wol, wo ik dat don solde. Hir legget muschatenblomen unde loze syde; ik wolde wol, dat elk sin deel darvan hedde. Item ik hebbe an ghelde entfangen ume trent by 200 mark Lub. unde men is uns nu schuldich^{[WS 1]} van linwande op winachten by 300 unde 60 mark Lub. unde ik hebbe noch 4 stuck unvorkofft. Item Hans van Minden is schuldich 600 mark Lub. Darvan solde he betalt hebben 300 op Michelis unde de anderen 300 nu op winachten. Item darto so wer he noch schuldich van syde unde van anderem ghelde wol op 70 mark. Item dat hus to Luneborghe is noch unvorkofft. Her Clawes hevet my ghescreven, et en welle nicht mer dan 700 mark ghelden. Ik hebbe eme screven, dat he dat vorkope unde neme dat meste ghelt. Anders en wet ik ju nicht to screven dan blivet ghesunt. Ghescreven des sundaghes vor winachten anno 15.

Tiideman Brekelvelde.

Item, Hildebrant, so hebben hir tosamene west de stede alse Stetin, Gripeswalt, Sund, Rostok, Wismer, Luneborg unde Hamborg ume den anevank den de konink van Denemarkete op desse stat ghedan hevet op Schonen unde der sake wel desse stat bliven to ere unde to rechte by den steden mer anders neine sake der sake alse van des olden rades wegene der enwel desse stat by niemende bliven dan by deme Romeschen koninghe unde unse rat hevet enen breff van deme Romeschen koninghe an den koninghe van Denemarkete, de quam dallink ersten hir. Iz et sake, dat de koning van Denemarkete na deme breve don wil, so salt wol gut werden. Wes hir nu van schiit des werden wy wol ghewar.

Anmerkungen (Wikisource)

1. Vorlage: schluldich

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 65. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_136.jpg&oldid=- (Version vom 31.7.2018)