Seite:Briefwechsel Hildebrand Veckinchusen 131.jpg

	Wilhelm Stieda (Hrsg.): Briefwechsel Hildebrand Veckinchusen

Hildebrant, ik en twivel dar nicht ane, de vrowen, de my aff pleghen to kopene, dat de van Ludeken nicht en kopen, op dat ik en vorkopen wel unde loven wel, al wo seer dat he ok to en gheet unde biddet se, dat se van eme kopen. Hir sin 2 vrowen, den leet Diderik Letberch syde bringhen, wante he hevet erer beder modder; en were dat, so wolde ik mest alde vrowen to miner behoff hebben, wante de sin van aldinges vrunt hir to hus ghewest. Queme my nu solke syde, alse ik ju van hir sante, dat solde uns vrome don. Hildebrant, ik wel des besten ramen, desgheliken bidde ik ju ok to donde, unde iz et, dat gy icht van my vornemen anders dan gy et van my nemen wolden, dat scrivet my vriliken, iz et dat ik war unrecht ane hebben, ik wels altos by ju bliven. Hirmede blivet ghesunt unde grotet alle juwe ghesinde, dat is wiif unde kindere unde des lovet my to guder truwe alse verne alset juwe wille were unde gut were, so wolde ik, dat ik Drudeke juwe dochter alret hir mit my were unde ik hope to Gode, dat et hir noch gut werden sole, so en hedde ik ju in der werlt nerghen lever dan hir. De leve Got voghet, alset vor uns allen [gut] sy amen. Ghescreven 20 daghe in julio.

Tydeman Brekelvelde.

107. Tideman Brekelvelde (in Lübeck) an Hildebrant Veckinhusen in Brügge. – 1415 Aug. 6.

Rev. St.-A. Orig. Adr.: An Hildebrant Veckinchusen to Brugge littera detur.

Vruntlike grote unde wes ik gudes vormach. Hildebrant, gude vrunt, ju gheleve to wetene, dat ik juwen breff, ghescreven 13 daghe in julio wol vornomen hebbe alse gy screven, dat Peter Johannessone, dar wy de 4000 9 tymmer unde de 7 quartir werkes inne hadden, wol in de Maze komen sy, unse leve Herre, de sy ghelovet beholdene vart. Dot wol unde ramet des besten darby, dat et vorkofft werde. Ik hedde ghemeint, gy heddent alrede over lanck entfanghen hat. Gy screven in deme sulven breve, dat gy nicht vele seggen noch scriven en kunnen unde gy en kennen der nyen werlt nicht, seker, Hildebrant, wo gy dat meinen, des en wet ik nicht mer, gy moghen my des wol beloven, dat ik my ok mit der nyen werlt nicht behelpen en kan. Doch ik hope, dat gy my dar nicht mede en meinen. Item alse gy my screven, do gy uns de moyerde van Tomaschen kofften, dat gy do 1 ghesneden Tomasch kofften to juwes neven behoff, darvor were eme worden 3 ℔ 15 sl. grote unde ½ stuck sulvers. Hildebrant, dat eventur is de bate, al hedden my duzent worff de moyerde sulven toghehort, so hedde ik dar nicht bet by don kunt dan ik ghedan hebbe: ik en kan den luden boven eren willen nicht vorkopen. Hedden de laken ume rede ghelt ghekofft west, ik hedde se alrede over lanck to Lyfflande wart ghesant, wante de lichtgrone insin hir neine ghadinge.

Item Hildebrant, ik hebbe op dat nye van unser syden vorkofft 5½ ℔ min 3 lot to 5 mark, mer my is sune, dat ik dar doeke vor nemen mot, sal

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 60. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_131.jpg&oldid=- (Version vom 31.7.2018)