Seite:Briefwechsel Hildebrand Veckinchusen 123.jpg

	Wilhelm Stieda (Hrsg.): Briefwechsel Hildebrand Veckinchusen

alse dat doch binnen kort nicht vele suner en was mit my. Doch unse Herre Got hevet my noch dach ghegeven, Hildebrant, wy sin al sterfflich unde mine vrunde hebben my ghesproken unde gheven my wol rakennene van deme ghelde dat (wy)^[1] ju unde juwem brodere ghesant is, dar ik ok vor ghescreven sta in der stat boke, lik alse vorscreven stet unde wisten my to seggende, dat ik wol wiste, wo dat et vore na doder hant, ok op welker siit dat et were unde vragheden my, off de rat dat ghelt van my jotonns hebben wolde, war ik dat nemen wolde, se leiten dat stan off miner to kort were unde hebben my so vele underwizet, Hildebrant, dat min begherte van ju is, dat gy my so vele gheldes hir weder maken, alse wy ju ghesant hebben van juwes broder wegene off maket my solke vorwaringghe hir binnen, off miner to kort worde, dat mine erve dat nein kost noch vordreyt van hebben en dorfften. Hildebrant, dit moghe gy Zyverde aldus scriven, wante ik en wel nicht lengher in des stades boke ghescreven stan. Ik en wete, war ik des gheldes warnemen moghe, off et darto queme, dat et de rat hebben wolde. Hir scrivet my en kort antwerde. Darmede blivet ghesunt. Ghescreven 9 daghe in majo anno 15.

Tydeman Brekelvelde.

Ik danke Willem Rücherdes van miner weghene, dat he my dat so wol seghede, dat he darwars wolde unde dat he my ok so wol gude nacht seghede. Vellet my, so ik wolde eme des gheliken don.

104. Hildebrand Veckinhusen in Brügge an Sivert Vechinhusen. – 1415 Juni 7.

Rev. St.-A. Offenbar Konzept des Briefes.

In den namen uns heren Jhesus. Broder Syvert so wete dat ick untfench int jar 1410 umme trent 12 in october 5 bale sardoke van dyr weghen, darvan worden my blyvendes 59 ℔ 6 gr. Des so koftes tu op my 450 Rynsche gulden, darvor gaf ick tohope 61 ℔ 17 sl. 6 gr.^[2], aldus so bleves tu my darvan schuldych do 2 ℔ 17 sl. gr. Item so betalde ick Johannes Knechteken 100 gulden, darvor gaf ick 13 ℔ 15 sl. gr., aldus so bleves tu my do broder 16 ℔ 12 sl. schuldych.

Item broder so untfench ick van dyr weghen do van Johannes van Werden unde van Osterman 80 ℔ gr., darvan sloch ick do, also ick dy ok wol scref, dey 16 ℔ 12 sl. gr., des so blef ick dy do op dey tyt van den 80 ℔ gr. nicht mer dan 63 ℔ 8 sl.

Item broder so weres tu my van her Hartwych Stenhus weghen myt mer worden 11 ℔ 17 sl. 6 gr., dey sloch ick do af an den 63 ℔ 8 sl., des so blef ick dy do schuldych 51 ℔ 10 sl. 6 gr. Item so gaf ick Stenhus na to dynen delle noch 18 gr. Item so antworde ick Slyper to dyr behoyf ½ laken,

---

1. Das Wort ist nachträglich ohne Rücksicht auf den Satz eingefügt.
2. Hier ist im Papier ein Zeichen gemacht und zu demselben am Rande vermerkt: Johannes Duvel 300 gulden, Kerstegan von Munhem 150 gulden, summa 450 gulden.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 52. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_123.jpg&oldid=- (Version vom 31.7.2018)