|
Wilhelm Stieda (Hrsg.): Briefwechsel Hildebrand Veckinchusen |
|
|
rekenscop, dat scryvet my und scryvet my juwe rekenscop ok, wy wellens, ef Got wel, wol eyns werden, war ic unrecht an hebbe, dar wel ic gerne aflaten. Item my duncket Lubeke moet elk overgeven met kopenscop dey buten Lubeke wandern welle. Dyt latet by ju blyven, gy solen bynnen kord wol mer vornemen.
Item my duncket dat stychte van Ryge sole weder by myn hern den byschop van Ryge komen, so mochtet dar noch gud werden bynnen kord.
Item in dessen jare welt vuste to mercken syn, want al umme heven wol und darna moge wy seyn, war wy hennewellen und war wy unse dync opsetten wellen. Got geve uns des besten to doene to ewycheyt. Grotet myn suster und al vrunt. Ghescreven op der hyllegen 11000 megede dach 1412 jar.
82. Tomas Veckinchusen an Sivert Veckinchusen in Köln. – 1412 Dezbr. 23.
- Rev. St.-A. Orig. Pap. Adr.: An Ziver Vockinchusen to Kollen of wor he is littera detur.
Minen denst tovoren ghescreven unde wes ic gudes vormach to allen tyden bereit. Zivert vedder, ju gheleve to wete also ic ju vake unde vel ghescreven hebbe, also umme dat gelt, dat gy noch uppe rente hebben, myn vedder Hildebrant unde gy. Ic bydde ju vruntliken up allen denst, dat gy wol doen unde bestellen dat also my myn gelt up sunte Johannes dage to Lubeke werde untrichtet werde; wente weren hir lude, de hir gelt utgeven willen unde untfangent to Lubeke wedder unde dar were wol bate an. Dit dencke ic to donde, wante gy myr jo ghescreven hebben, dat gy it nu to sunte Johannes dage willen utgeven, enschege des nicht dat Got vorbede, des mochte ic in groten schaden komen, des ic doch nicht en hope et en werde dar wol untrichtet. Hirumme leve vedder en vorsumet my dar ju nicht an; de rente van den 450 marken lopet sic by den 53 marken, dat is tosamende dan 500 mark Lub. Myn suster Fieken, de sal hebben Hildebrande van den Eken, deme mot ic nu 100 mark untrichten. Ic wolde wol, dat gy unde ju broder hir in dem lande ghebleven weren, wolde gy ju hir noch geven int lant, ic mene dat en solde tegen ju nicht wesen, were wy by den anderen, so mochte unser en dem anderen somtides in scaden stan, ny sy wy leider to vere van den anderen, Got van hemelrike, de voge uns to dat uns nutte sy an sele unde lif. Ic en wet ju sunderinges nu nicht to scriven, men alle vrunt sin van der ghenade Godes ghesunt unde wol toreke. Ic hebbe van Wulve 4 doke untfangen, der en kan ic nicht vorkopen, wante de doke en sin hir gene gadinge. Item Hannes Langerben, de hevet 8 mark, dar hebbe ic eme 8 tegen ghedan. Anders nicht uppe dusse tyt dan blivet ghesunt in Gode unde grotet myn susteken unde alle vrunt sere. Ghescreven 2 dage vor Kerstmesse 1412 jar.
: Briefwechsel Hildebrand Veckinchusen. Leipzig: S. Hirzel, 1921, Seite 29. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_100.jpg&oldid=- (Version vom 31.7.2018)
