|
Wilhelm Stieda (Hrsg.): Briefwechsel Hildebrand Veckinchusen |
|
|
nest komet 400 gulden cronen weder to geven sunder eynyge togerynge. War dat nicht en schege, so belove ic Zyverd vorscreven und myne erven Peter vorscreven allen schaden und kost optorychten. To merer sekerheyt hebbe ic dessen breyf met myner hand screven und myn pytzet neden an dey scryft druocket int jar 1412 jar in der vastmyssen to Francvord.
72. Hildebrand Veckinchusen in Brügge an Tydeman Brekelveld in Lübeck — 1412. März 17.
- Rev. St.-A. Pap. Adr.: An Tydeman Brekelvelden in Lubeke lyttera detur. a. b. c.
Darunter von derselben Hand: Tydeman Brekelvelde hevet my rekenschop gedan van dessen 3 terlinge wandes.
a. b. c. 
Vrentlike grote vorgescreven Tydeman Brekelvelde gude vrunt, ju geleyve to wetende dat ic ju sende to Hamborch wort noch op myn propper eventur 3 terlinge wandes, aldus gemerket.
Dey terlinch myt den a es in schepper Hinrych van Ryppen; hir synt inne 18 Tomasche laken myt den sclachdoke, also 2 satblau, dat ene is gesneden unde es ton sclachdoke 3 grone 1 hemelblau 4 persche 4 sanwyn 4 rode. Item dey terlinch myt den be es in schepper Heyne Gher, hir is inne 17 helle Tomasche laken, also 2 satblau 2 grone 1 hemelblau 4 persche 4 sanwyn 4 rode.
Item so es to den sclachdoke 1 snede pers van sunte Tomass, dyt sint tohope in 2 terlinge 35 Tomasche laken myt den sclachdoke unde ic bydde ju, dat gy also wol welt don unde vorkopet my desse 2 terlinge laken ton mynen besten profyte umme ret gelt unde gevet sey, so sey mest gelden kunne, hirane so ramet myn beste umme myns vordenstes willen.
Item so es de dorde terlinch myt den c in scheper Petter Wyllemes, dat is inne 13 Tomasche laken, also ein satblau 1 grone 3 persche 4 rode 3 sanwyn unde 1 hemelblau unde hir is ton sclachdoke 1 pers Tomas ton sclachdoke. Desse terlinch antwort Boden van Stocham unde seget emen, dat he den terlinch neme in mynerynge van der schult, dey wy eme schuldich syn van Karbouwen wegen. Got geve, dat Peter anders vordach moyte werden eme seget Boden, dat he de laken vorkopen den hogesten pryse unde holde dat gelt in mynerynge van uns.
Item dey is dey eine tunne myt der syde in Snydewynde. Anders en wet ic ju nu wat mer to scryvende, mer ramet des besten dat de laken vorkoft werden. Ic hope ic fynt gude gadinge van laken wert, ok dat dar welk varve inne weren ein ofte 2, dey de lude nicht hebben wolden, so lat se utsteken. Anders en wet ic ju nu wat mer to scryvende mer. Wart wol in Gode. Gescreven 17 in merte 1412 in Brugge.
Item desse terlinch hebbe ic gescreven to Hamborch an Albracht, cranmester, dey sal se untfangen unde sol se ju vort senden. Got geve beholden wart. Amen al umme.
: Briefwechsel Hildebrand Veckinchusen. Leipzig: S. Hirzel, 1921, Seite 14. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_085.jpg&oldid=- (Version vom 31.7.2018)
