|
Wilhelm Stieda (Hrsg.): Briefwechsel Hildebrand Veckinchusen |
|
|
dan 4500 und 12 ℔ 13 sl. 6 ₰, aldus schelet dar 10 sl. und 4 ₰, dar gy nicht so vele utghegeven hebben alze ju summe torecht. Item hebbe gy weder untfanghen na juwen schryven 4400 und 78 ℔ 19 sl. 3 gr., da schelet 12 groten, dat gy mer untfanghen hebben alze gy afgheslagen hebben 13 ℔ 12 sl. 11 gr. de gy ghegeven hebben Lambrecht van Sune to ungelde und dan noch 3 sl. 11 gr., de gy ghegeven hebben to ungelde vor muschaten, so is de summe recht op 12 groten na, also juwe bok utwyset.
Item so vynde wy schelynge in juwer rekenscop da gy untfangen hebben, aldus hebbe gy gescreven also hirna ghescreven steyt.
Item hebbe ich untfanghen van Slipers wegene da he ut hadde geven vor 1 pak van enes Lumbardes weghene 4 gulden, darvor hebbe gy untfanghen 9 sl. 3 dn. Item so gaf my Francisco van Peter Karbow wegene van 35 ducaten 2 ℔ 2½ sl., dit en is ummer nicht recht. Item so sande my Hans Francke 4 swarte sardoke, de gulden 22 sl. groten, aldus stet in juwen poppir gheschreven.
Item Hildebrant so was Slipers rekenscop hir und dar vynde wy inne, dat gy solden opghebort hebben van enen Lumbarde to Bruge 14 gulden und 34 sl. Colsch; item noch van enen Lumbarde 15 gulden, dit en vynde wy in juwen boke nicht, doch so wissen wi dat gy de 15 gulden ghescreven hebben op 2 ℔ 2 sl. 6 groten, de dar stan na den ducaten, aldus so hebbe gy vorgheten de 14 gulden to schryven und dan wes gy untfangen vor 35 ducaten.
Item Hildebrant so en hebbe gy ok nicht ghescreven de 10 ℔ groten, de wi Andreus van Hacheden ghegeven hebben.
Item Hildebrant so hebbe gy de 8000 Podolsches werkes in juwe summe gherekent, doet wol und latet dar stan up dat nyet, wante wy doen dar noch rekenscop hirvan. Wy en hebben noch anders nicht untfanghen van dem gude, dat wy in Prusen ghesant hebben … sulke also wy dat wers ghesant hebben wente wolde gy … dar … en und wy … hir, so wordet twie gherekent, hir umme so latet dat werk by sik staen.
Item Hildebrant ik hebbe hir drade 2½ weken ghewest und ik en byn alles dynges noch nicht vele wizer, dan do ik herquam unser een en kan des anderen nicht vornemen nochtan kone wy alle wol dudesch. Item als gy ghescreven hebben van Studen alse van 80 ℔, de ju weder over ghekomen syn, wo gy meynen dat de selscop den scaden dreghen sole und gi nicht, Hildebrant also deghene her comen de de selschop op eyn ende rekenen solen, wo se dat dan maken dat behaget my wol. Hirmede blyvet ghesunt. Ghescreven ipso die Simonis et Judae apostolorum anno 11.
64. Sivert Veckinhusen in Köln an Hildebrand Veckinhusen in Brügge. — 1411 Novbr. 7 und 8.
- Rev. St.-A. Orig. Pap. Beide Briefe lagen ineinander und nur der letztere trägt die Adr.: An Hyldebrand Veckynchusen Brugge
: Briefwechsel Hildebrand Veckinchusen. Leipzig: S. Hirzel, 1921, Seite 6. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_077.jpg&oldid=- (Version vom 31.7.2018)
