Seite:Briefwechsel Hildebrand Veckinchusen 053.jpg

	Briefwechsel Hildebrand Veckinchusen

heylden, wand dat es my let, dat gy also vele dar int land tachter syn. Got geve dat ju ummer gud kome vor den wyntter. Item also gy scryven, dat gy also vele geldes ofnomen hebben ut unser selscop also ic ju propper und der selscop schuldych sy, des hope ic sole neyn noet doen also vele aftonemen. Gy hebben tegen my schult, dey ic der selscop und ju solde schuldych syn afnomen by 224 ℔ gr., wan gy afnemen wellen, so latet uns elk 150 ℔ gr. afnemen van myne 150 ℔ gr. nemet gy to ju, dat gelt, dat ic propper schuldych und ok dat gelt, dat ic der selscop schuldych, so meyne ic, dat sole dey slechtest rekenscop werden. Na der mysse wel ic ju wol scryven, wovele ic behove optonemen, wan dat scheyn es, so welle wy dan elke rekenscop op eyn eynde slu^oten; bynnen desser tyt moge gy ok weten woet umme dat gelt to Lubeke es und rekenscop van al umme krygen; ic hope al dync sole sonder begryp syn. Grotet alle vrunt. Ghescreven 5 dage na sunte Bartolmeus dage 1410 jar.

Zyverd Vockynchusen, Kolnne.

38. Sivert Veckinhusen in Frankfurt an Hildebrand Veckinhusen in Brügge. – 1410 Aug. 20.

Rev. St.-A. Orig. Pap. Adr.: An Hyldebrand Veckynchusen to Brugge littera detur. Darunter von H. Veck.’s Hand: 18 in settember 150 Rynschgulden.

Broderlyke leyve vorscreven wetet leyve broder, dat ic ju bydde, dat gy geven Johan Knechteken ofte brenger desses breyves van syner wegen 150 Rynsch gulden, vor elken gulden gevet eme 33 gude gr. to dancke und ic van dessen 150 gulden sal Johannes van den Bockel utgeven 50 gulden, dey hebbe ic hyr geven Johannes Veckynchusen to terynge und ic wel nicht mer op ju overkopen op dat eyrste. Ok meyne ic ju 5 ballen sardoke to senden also ic eyrst kan, dar gy gelt afmaken mogen. Ic wel ju hyr nest van Kolnne al dync scryven. Grotet alle vrunt. Ghescreven des myddewekens na unser leyven vrowen dage 1410 jar. Sardoke gelden hyr dey valbe 91 gulden.

Zyverd Vockynchusen Vrancvord.

39. Sivert Veckinhusen in Köln an Hildebrand Veckinhusen in Brügge. – 1410 Aug. 22.

Rev. St.-A. Orig. Pap. Adr.: An Hyldebrand Veckynchu^osen to Bru^ogge littera detur. Von Hild. Veck.’s Hand: 400 gulden; 1410, 25 in setember.

Broderlyke leyve vorscreven wetet, dat ic ju bydde dat gy geven Johan Knechteken ofte dey ju mynen breyf brenget 150 gulden, des sal Johannes Boekel 50 gulden betalen van Johannes Veckynchusen wegen.

Item hebbe ic opnomen to Lubeke ward 216 marc Lub., dey sal Johannes van Mynden betalen van juwen gelde, dat gy op eme overkoft

Empfohlene Zitierweise:
Briefwechsel Hildebrand Veckinchusen, Seite 53. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_053.jpg&oldid=- (Version vom 31.7.2018)