my jaget, ic wet my recht, met der hulppe Godes wel ic my ok unrechtes wern, also ic best kan, myn here van den Berge und ander vrunt wellen my vordegedyngen und to rechte helppen. Got geve, dat et beter valle. Ic wel noch neyn borger werden, er ic wet wo et to Lubeke varn wel. Got voget to den besten al umme.
Item umme dey 400 gulden, Hynric Slyper hevet dat op syk nomen und scryvet darvan syn gudduncken; bekummerd ju dar nicht mede. Hedde wy bewarynge so wer dat gelt gud utgeven, wolde Kule dey 440 gulden hebben, worde uns dey bewarynge nicht bynnen ½ jare dat hey uns dan dey 500 gulden efte 440 gulden weder geve, aldus salt Slyper ok scryven und dat Werner altyt Kulen vul beyde.
Item wan dey rys komet, so wel ic des besten darby ramen, ic meyne wy solen wol to gelde komen, wynd[1] moten hyrnest hyr und to Vrancvord wunnen werden an sayen konynen und andern dyngen.
Item umme Lyseken temelyken to holden, dat es noch gud to doene, wand sey hevet ummer noch nicht men 2 rocke, dey nicht vele dogen. Arnd Wachendorp helt hyr syn wyf int hogeste, dar werd Lyseke umme vorsproken, doch wel ic des besten ramen int myddel also ic best kan. Item werk were gud koft to Venedyen ward, kunde wy dat wol utreyden, ic wolde dat wy al unser selscap gud an wercke to Venedyen hedden und dat et dar op ½ jar vorborget were, op dat wy mer met reyden gelde mochten kopslagen. Ic wet neyn selscap dar ic mer trost to hebbe dan to der Venedyesschen selscap, wel Got beholden reyse geven. Dat wel ovele to der see ward staen und ok in andern landen umme Lubeke ut, dey clot lach noch nicht met der achte, dat sal men vol bevynden, men sal noch in vele landen van der achte holden mer dan som lude moet hebben, werd ok eyn nye konync, so mach dat noch al wunderlyken vallen. My es leyf, dat ic ut Lubeke sy, wand ic hadde dar also vele unghemakes, dat my dar nicht weder vorlanget und myne gude meynynge und grot arbeyt werd my ovel loent, mochten som lude raden, men ic hope Got und recht sole my helppen. Grotet myn suster und alle vrunt. Scryvet my weder eyn antword und gudduncken op dey utscryft also myne borgerscap opsaget es und nemet rat met vriden. Ghescreven op sunte Peters avent 1410 jar.
34. Sivert Veckinhusen aus Köln an Hildebrand Veckinhusen in Brügge. – 1410 Aug. 2.
- Rev. St.-A. Orig. Pap. Adr.: An Hyldebrand Veckynchusen Brugge littera detur. Der Brief macht den Eindruck eines Fragments; der Anfang, wohl auf einem anderen Blatte, scheint verloren.
Item wetet leyve broder, dat ic meyne, dat unse selscap van my nicht mer tachter sy dan 262 marc 6½ sl. Lub. und darto dey 24 marc Prusch, dey ic over 2 jaren in Prusen van unser selscap gelde nam. Dey 18 marc Prusch
- ↑ Win-Denare, d. h. Gewinn-Pfennige.
Briefwechsel Hildebrand Veckinchusen, Seite 44. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_044.jpg&oldid=- (Version vom 31.7.2018)
