hope ic, dat desse andern und al unse selscap solen alle ansprake wol letych blyven und ok werd uns breyve van deme konynge, wan my dey komen, so wel ic ju utscryft senden.
Item so hebbe ic to den olden rade screven, dat wy 2 tunnen werk op Gotlande hebben ofte dey bekumerd syn, dat dey ghevryet solen werden, dyt hebbe ic her Herman Yborge mynem swager screven, ic hope unse gud und selscap sole sunder angest van der achte blyven, ef Got wel, mach men vrunden loven, ic hebbe myn best daen an dessen saken und in unser selscap; mach neyn borger gud van Lubeke blyven ofte wy solden des alle untgelden; ok dyt segget Hynric opme Orde, dat he dyt ok vrunden scryve op dat wy sunder schaden blyven. Item so sal eyn dachvard werden to Hamborch van den meynen steden, dar hope ic dat men ok umme dey Lubesche sake spreken sole, werdet dar nicht vorlyket, so vruocht ic, dat er nummer gud werde, so wel ic Lubeke overgeven und seyn umme eyn huos inne to wonen. Plaggal wel my syn hus doen to eyner tyt, welt nicht beter werden, so vare ik dar in tegen Mychele und my unbreket men al retschap, dey ic in deme huse behove. Welt nicht anders to Lubeke werden, so es myn rat, dat wy hyr 1 jar ofte 2 jar tohope wonen und darbynnen unse dync saten und geven uns hyr tovreden und deynen unsen leyven hern Gode. Ic hope, wy wolden uns hyr wol bergen met der hulpe Godes. Slechtet al dync und latet uns unsen leyven hern Got bydden, dat uns to voge dat uns gud sy to ewycheyt. Grotet alle vrunt, helpet Losekinge des besten to allen dyngen und scryvet my al tydynge weder.
Item Arnd Wachedorp sal vele werk kopen, est dar hey kop hebben mach und ok ander dync, hey sal dar wol 1000 ℔ gr. bewern reydes geldes. Dyt latet by ju bynnen. Kopet uns werk bytyden und sendet uns dar met den eyrsten.
26. Sivert Veckinhusen in Köln an Hildebrand Veckinhusen in Brügge. – 1410, April 6.
- Rev. St.-A. Orig. Adr.: An Hyldebrand Veckynchusen to Brugge littera detur.
Broderlyke leyven vorscreven. Wetet dat Bernd myn knecht weder komen es van sunte Gallen und hevet dar 500 gulden van unser selschap wegen brecht, dyt segget Slyper und gevet dar Losekynge 350 gulden ofte deme hey syn dync bevolen hevet.
Item my duncket, dat dey bynnen Lubeke gud und huse bekummerd hebben, dat Arnd Wachendorp tohoert; ofte myn gud ok bekummerd syn moge, des wet ic nicht men es dat bekummerd, so est quat, so moet ic eynen andern rat dencken na vrunde rade, vorneme gy solkes wat, so scryvet my ju gudduncken, hedde dey konync levet, so wolde ic mynen schaden wol nakomen hebben, dyt latet by ju blyven.
Item hedde dey wulle to Mechelen togaen und vord na Straseborge und vord to Kostnisse, dat solde batet hebben mer dan 200 gulden und Hans
Wilhelm Stieda (Hrsg.): Briefwechsel Hildebrand Veckinchusen. Leipzig 1921, Seite 34. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_034.jpg&oldid=- (Version vom 31.7.2018)
