den juwen gherne doen willen to allen tyden. Gescreven is desse breff to Rige in den jaren der geburt Christi 1407 des neghesten daghes na sunte Laurencius daghe under unsem secrete tor tuchnisse der vorscreven sake torugghe on dessen breff ghedrucket.
14. Engelbrecht Witte in Riga an Hildebrand Veckinchusen in Brügge – 1407 August 16.
- Rev. St.-A. Orig. in zwei gleichlautenden Exemplaren, die sich nur insoweit voneinander unterscheiden, als auf dem einen die Adresse bis auf einige Buchstaben wegradiert ist und das Postskriptum fehlt. Adr.: Deme erbaren manne Hillebrande Veckinchusen to Bruegge kome desse breff.
Vruntliken grot tovoren ghescreven an mynen leven swagher Hillebrant Veckinchusen unde myne leve dochter. Weten schole gi, dat ik ju zende in Gert van Minden 18 stucke wasses, der doet dat beste by, dar bidde ik ju umme. Vortmer leve swager, alze ik ju wol eer gescreven hebbe van den zaken alze van Walraven weghen unde hebbe my beklaghet, dat my nu redelicheyt is gheschen van der wedderlegghinghe, de wi hadden tosamende, ik en kunde siner nerghen nakomen, dat my mochte redelicheyt scheen zint dat Lambrecht Junghe wart ghenomen zint een qwam hee ny in dat land to Lifflande, dat hee my welde doen schichtinghe. Hirumme leve swagher, so zende ik ju enen breff, de is open unde is buten besegelt myt des stades inghezegel van der Rige, na deme breve moghe gi ju richten, kan ju wes van em ghewarden, dat gheve ik juwen kinderen. Item zende ik ju by deme sulven schepperen ene tunne, dar is inne 2 droghe lesse, butthen unde stromlinghe alzo gud alze ze zin. Item leve swagher, so doet wol unde zendet my neen solt meer; et is zun, et wart hir komen uppe 5 mark edder 6, wante eet gelt hir rede 8 mark Rig., dat beste, dat hir is; schulde ik dat Lissebundesch solt vorkopen, dat gi my lest zanden in Stolteken, ik een kundes vor 6 mark nicht gheven, wente et is swart unde is eyslik unde hebbe nu pund darvan vorkofft. Vortmer zo bidde ik ju, dat gi wol doen unde doen dat beste by mynen dinghen, dat gi dar hebben alze gi gerne doen, wente dat was steyt 21 mark zunder allerleyt ungelt, hirumme ramet des besten alze gi allewegen gerne doen. Item doet wol unde kopet over to Lubeke an juwen broder Syverde 5 punt edder 10 pund groten edder 6, dar he my mede moghen kopen, des ik behove in myme huse. Item leve swager so schole gi dat gelt vinden van Walravens weghen under enem, de heyt Henrencius Scherer. Item dot wol unde ghevet deme scheppheren 10 schilling groten to halver vracht. Nicht meer to desser tyd, wy zin van Godes weghen alto male gezunt, desgheliken gheve ju ok God to langhen tiden. Varet wol unde bedet alleweghen to unde grotet Marghareten unse dochter sere unde alle unse vrunt. Gescreven to Rige, des anderen dages na unser vrowen daghe erer hemmelvart in den jaren 1400 in deme 7. jar.
Briefwechsel Hildebrand Veckinchusen, Seite 13. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_013.jpg&oldid=- (Version vom 31.7.2018)
