dat wy dar nycht in enhebben. Vortmer so doet wol, leve swager, und vorwerpet unse dynk nycht; is dat wy dar wat hebben, wente et is wol suen, dat et unvrede wesen wyl myt den Russen myt den Pleskouwers. Und ok so is hir alreleye guet tomale duere: was gelt hir 23 marc Ryg. Und Evert Snoye, myn neve, sael hirnegest, of Got wyl, nakomen myt deme, dat Got vorlenet hevet. Vart wol und blyvet gesunt tho langer thyt und bet to my, wes ic vormach und grotet Greten ser und or dochter. Geschreven 8 dage na des hylgen kruses dage.
13. Die Stadt Riga an den Kaufmann der deutschen Hanse in Brügge. – 1407 Aug. 11.
- Rev. St.-A. Orig. Pap. mit den Resten des Wachssiegels der Stadt. Adresse fehlt.
Den ersamen vorsichtighen mannen olderluden des copmans ut der dutschen hense to Brugghe in Flandern borghermeistere unde raat der stat Rige vruntlike grote mit wunsche alles heyles. Juwer vorsichtighen leve begheren wy witlik to donde in dessem breve, dat in unser jeghenwordicheit wesende de beschedene man Engelbrecht Witte unsser medeborgher uns hefft to vorstande gegheven, wo dat he vor etliken jaren eynen gesellen, gheheten Hans Walraven, wedderleghet hadde, de nu over dem jare in der stad Dantzik in Prusen afflivich is gheworden unde wente Enghelbrecht vorgenant van dem vorscreven Hans Walraven van der vorscreven wedderlegghinge nenerleye schichtinge hefft entfanghen noch ymande anders, dem he dat bevolen hadde, alzo he dat myt synen rechte unde geswornen eden vor uns hefft war gemaket, dat he sodane schichtinge to entfande nymande anders wen Hans Stokstorpe bevolen hadde, so hefft Enghelbrecht vake genant vor uns gesat unde gemaket to synen rechten waren unde volmechtigen procurator unde vorderer Hillebrand Vockinkhusen, affwesende, likerwys offt he jeghenwordich were, to manende, to vorvolghende, to vorderende upptoborende unde to entfande na vruntschoppen edder mit rechten sodane gud unde ghelt alze Enghelbrechte van der vorscreven schichtinge weghene von Hans Walraves gude mach to geboren, wor unde under wem Hillebrand Vockinchuss vorscreven dat mach bekomen mit vuller macht darby to donde allent dat Enghelbrecht Witte doen schulde unde mochte went dat he sulven jeghenwordich were unde wes Hillebrand van Enghelbrechtes weghene in der vorgerode sake donde wert, dat schal vulkomene macht hebben likerwis off Enghelbrecht dat sulven dede, des schole gi gantzen geloven unde sekere tovorsicht to uns hebben, wente wy van Enghelbrecht vake genant nogafftige vorwissinge darvor entfangen hebben, worum bidde wy juwe vorsichtigen leve mit sunderghen vlite, dat gi Hillebrand er genant behulplik willen wesen, dat en van Enghelbrechtes weghene in der vorscreven sake recht unde redelicheit weddervare. Desgelik wy ju unde
Briefwechsel Hildebrand Veckinchusen, Seite 12. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_012.jpg&oldid=- (Version vom 31.7.2018)
