rente. Item so hebbe ik in dem rade to Lubeke 21 marc wicbelde rente. Item hebbe ik in der Sluoterschen huose 6 marc wicbelde rente und in Herman Bredeveldes huse in der smedestraten 18 marc wicbelde rente. Desse vorbenomeden rente bescheide ik und gheve Lyseken mynem wive und al ere cledere, de er to eren live ghesneden synt, myt alleme smide, ghulden sulvern und vorghuldet, dat dar to behoret und ere ghuldene breetzen und ere ghuldene vingherne und vorspanne und myne besten sulverne kannen und 2 grote sulverne schalen und 1 cruodenap. Darto gheve ik eer den eghendom mynes huoses, dar ik ynne wone, dat se des bruke like varende have als he my varende to screven steit in des stades boke to Lubeke und dar boven gheve ik er al myn inghedoeme half utenomen myn sulvern smide. Hirmede schichte ik und vorscheide se van alle mynen gude beweghelik und unbeweghelik. Item sy to wetende, dat ik noch hebbe in deme rade to Lubeke 25 marc wicbelde rente und in Rughen huse in der Waghemans straten 8 marc wicbelde rente, und in Arendes huse van Dorptmunde 7½ marc wicbelde rente. Ok so hebbe ik na mynes wives Lyseken moder dode 20 marc wicbelde rente in Hinrikes huse van Stade. Ik bescheide und wil, dat myne kindere, de God mynem wive Lyseken und my vorlenet heft, und noch vorlenen mach, desser vorscrevenen rente scholen bruoken und 1200 marc reyder penninge und darto de helfte al mynes inghedomes, utenomen myn sulvern smyde, under also danne underscheyde, isset dat myn dochter Margrete so langhe levet, dat se manbaer wert, dat men er dann gheve 1200 marc und myn inghedome half utghenomen dat sulvern smyde, to eren brutschatte. Hirmede scholen myne kindere gheschichtet und ghescheiden wesen van al mynem gude beweghelik unde unbeweghelik. Item gheve ik mynen vormunderen 10 marc pennige to wynpennighe und eynem ysliken eyne sulvern schalen. Item al myn ander ghuod beweghelik und unbeweghelik scholen myne vormundere gheven in de ere Godes, vor en dat alder best dunket besteden wesen to troste myner selen. Mine vormundere kese ik Hildebrande Vockinghusen mynen broder, Johanne Tymmen, Hinrike up dem Orde, Herborde van Lynnen, Tydeman Brekelvelde unde Willem Richardes unde Boden van Stockem. Alle desse vorscrevene stucke wil ik stede unde vast holden, so langhe dat ik se witliken wedderspreke myt levendigher stempne(!). Datum et actum Lubeke anno domini millesimo quadringentesimo sexto dominica qua canitur cantate domino cantia nomine alleluia. Testes sunt discreti viri ac domini Marquardus de Damen et Nicolausde Stiten, consules Lubicenses.
10. Das Testament des Ludwig Veckinchusen. — 1406 Mai 13.
- Rev. St.-A Kopie, Papier, arg beschädigt. Auf die letzte Seite hat eine Hand, die der Hildebrand Veckinhusen’s ähnlich sieht, geschrieben: God van hemelryke ghena her Lodewyghes Veckinchusen seyle unde allen kersten seyle; dyt es sin testament
Briefwechsel Hildebrand Veckinchusen, Seite 7. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_007.jpg&oldid=- (Version vom 17.8.2016)
