Römischer Keyserlichen Mayestat außschreiben den Türckenzug betreffendt

Textdaten
Autor: Karl V.
Illustrator: {{{ILLUSTRATOR}}}
Titel: Römischer Keyserlichen Mayestat außschreiben vnd vermanung / an alle stend der Christenheyt / den Türcken zug betreffendt.
Untertitel:
aus: Vorlage:none
Herausgeber:
Auflage:
Entstehungsdatum: 16. Juli 1532
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: Scans auf Commons (Ungarische Elektronische Bibliothek)
Kurzbeschreibung:
Eintrag in der GND: {{{GND}}}
Bild
Bearbeitungsstand
fertig
Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]
Editionsrichtlinien:
  • Als Grundlage dienen die Wikisource:Editionsrichtlinien
  • Überschriebene e über den Vokalen a, o und u wurden als moderne Umlaute transkribiert.
  • Überschriebenes o wird mit <sup> hochgestellt, also zum Beispiel uo
  • Abkürzungen sind aufgelöst.

[3]

Römischer Keyserlichen
Mayestat außschreiben vnd
vermanung / an alle stend der Christenheyt / den Türcken zug betreffendt.
PLVS VLTRA

[4] WIr Carl der Fünfft / von Gottes gnaden Römischer Kayser / zuo allen zeytten merer des Reychs / in Germanien / zuo Hispanien / Bayder Sicilien / Jerusalem / Hungern / Dalmatien / Croatien Künig / Ertzhertzog zuo Osterreych / Hertzog zuo Burgund / Graue zuo Habspurg / Flandern vnd Tyrol / Empieten allen vnd yedem frummen Christglaubigen menschen / gaystlichs vnnd weltlichs stands / Inn was würden oder wesen die sein / den diser vnser brieff fürkompt / vnsern freündtlichen gnedigen willen / gnad vnd alles guots / Wyewol vns gar nit zweyffelt / es sey mer dann offenbar / weß fürnemens der verfolger vnsers Christlichen glawbens / der Erbfeind der Türck ist / noch dannocht so haben wir / als das haupt gmayner Christenheit dem die sorgfeltigkeit / von wegen der selben Christlichen glyder zuo tragen auffgelegt ist / des jhenen so wir bemelts Türcken warhafftigenn fürhabens halber gewise kundtschafft inn mer denn in einen wege empfangen / neben vnserem Christlichen vorhaben / durch dises vnser offen

[5] außschreyben mänigklich verkünden vnd anzeygen wöllen / vnd hatt Nemlich dye gestalt. Aynmal ist es war / soll nyemants daran zweyffeln / das bemelter Türck / nach dem er zuo Constantinopel mit höchster vnnd gröster seyner macht außgezogen auff Sant Johannes tag zuo Sonwenden / nechstuerschinen / zuo Kriechischen weissenburg[1] ankommen ist / vnd hat bald darnach seyner öbersten einen Vmbrin Wascha[2] mit etlichen zanfoco / das seindt Hauptleüt / vnd vnder denen vil tausent pferd im vorzug / auf die Kron Hungern verordnet / wie er dann vor wenig tagen in der gegent Senig genant ankommen ist / der fürder herauff zuostraiffen / vnd die versamlung vnserer Churfürsten fürsten vnd stenden des heyligen Reychs kriegsuolck / verhinderen sollen / dem nu der bemelt Türck mit aigner person vnd gewaltigen heere nachuolgt / des entlichen fürnemens gestracks in Osterreich zuo ziehen / vnd vndersteen die statt Wien in sein gewalt zuopringen / vnnd also den schimpff / spot / schaden vnnd nachtheyl der jme dann nach vor vergangen im Neün vnd zwaintzigsten Jar / durch nit erobern bemelter stat / als er auch mit grosser macht daruor gewesen zuo gestanden ist / wyderumb zuo erholen / Zuo dem er (wie gedacht vnser kuntschaft lautten) inn mancherlay weg / als mit treffen-

[6] lichem geschütz grossen Mörscher feürwercken / vnd ainer treffenlichen anzal quastaderij vnnd grabern auff wasser vnd land versehen sein sol / vnd dieweil aber wie menigklich waißt das die statt Wien an solcher gelegner paß / auch nu zuomal dermassen befestnet ist / dz vns der ein grosses bedencken macht / wo er in des Türcken gewalt kommen sol / dauor doch der allmechtig Got mit seinen gnaden sein soll / das solchs nit der kleinest anfang zuo vndertruckung / vnnsers Christlichen namens vnd glaubens / Ja auch zuo höchster beraubung zeytlicher güter / Erbermlichen ellenden hinfüren / ermörden vnd erschlagen weyb vnd kinder / auch zerschlaiffung vnd verderbung aynes yeden vatterlandes / vnnd alles des / so zuo ayner narung / vnd auffenthaltung lebt / vnd auffrecht ist / gelanngen wurde / Das aber mitt Götlichen gnaden zuo fürkommen / so rüsten wir vns Höchstes vnsers vermügens zum anzug in das feld / des entlichen fürnemens vnd des heiligen Reychs fliegenden panir / mit vnser macht / aller stende vnd der yenen hilff die vns verfolgen mag / dem feind vnsers Christlichen glaubens in aigner person vnder augen zuo ziehen / vnsern leib vnd alles vnser vermügen nit zuo sparn / Sonder nach verleihung göttlicher gnaden vnderstehe die betrangte vnsere Christliche glider

[7] auß des Türcken Tiranney zuoentledigen / sie vnd die jhenen / wölche noch bißher / vor jm sicher vnd frey gewesen sein / vnder dem schadten vnserer flügel / das ist inn vnnser sicherunng zuonemen / sie zuo schützen vnd zuo schirmen / Nach dem aber / solchs alles wie obstet on anrüffung vnd jnnerlichs hertzlichs bitten gegen Gott / nach dem der sig allain in seiner hand / vnd nit in der menge od der stercke des grossen volcks steet / gar vnuerhoffenlich ist / vnd menigklich erachten kan / das gemeiner Christenheit / vnnd zuouorderst Teutscher Nation / solcher vnser fürgenommner Türckenzug / wozuo solchen auß Christlicher wolmeinung / in einmütigem guotem hertzenn dem Allmechtigen zuo lobe / vnd erhaltung vnd rettung / seines Christlichen glaubens vnd volcks / Ernstliche vnd statliche hilff beschicht / alles heil wolfart vnd bestendigen friden bringen mag / vnnd vns gar nicht zweiffelt / so der almechtig in rechtem glauben vnd vertrawen gepeten / er wurde vns vnd gemeiner Christenheit den sige wider den Türcken reichlich mit thailen / Dem selbenn nach so ermanen wir euch all vnd ewer jeden in sonderheit bey der liebe so er zuo Got dem almechtigen / vnd vnserm heyligen Christlichen glauben tregt / gnedigs fleiß begeren / Jr wöllen also ewer zuoflucht / vertrawen vnd hoffnung in got

[8] setzen / vnd dabey zuo hertzen fürenn / gedencken vnd betrachten / die gwaltig macht des Türcken / die er in wenig Jar on sondern widerstand / auf jn gepracht / darinn er vil Region / Lands vnnd Christlichs volcks / in sein gewalt vberkommen / den selben vil vihische vnd vnmenschliche joch / ewig dienstparkeit auffgelegt hat / vnd das solchs nit beschehe / auch yetzige Teutsche nation in souil manige ferligkait gesetzt werden / Wo vor jaren die vorgesessen dienen / so nun vnder des Türcken gehorsam getrungen / sein hilf vnd rettung erzeigt hetten / vnd ewer yeder auß sonnder betrachtung / das einem jeden frummen Christen zuosteet / vnd sein gewissen billich dahin weysen sol / mit seinen beschwerten mitglidere mittleidig zuo sein / denselben zuo helffen / vnd sie in nötten nicht zuouerlassen / Also sein vermüglich hilff zuoerzeygen / Vnd solch löblich Christlich wercke vnsers fürgenommen zugs / mit zuoziehen seiner selbs person / oder versoldung anderer personen vberschickung / vnd zuofüren / gschütz / puluer / prophant[3] / oder ander kriegs notturfft seines vermügens fürdern / vnd also in solcher / den Namenn aines frummen Christen / im werck erscheinen lassen / vns als dem Haupt / gemeiner Christennheit / auff solchen zug trewlich zuosetzen / Wie wir vns vngezweyffelt zuo euch allen / vnd ewr yedem in

[9] sonderheyt versehen / Daran erzeygt jhr zuo forderst dem allmechtigen ein wolgefallen werck / erlangt / euch vnd den ewrn ewigen lob vnd sycher / vnd schirmpt damit ewer vaterland / vnd wir wöllen solchs in allen freuntlichen vnd gnedigen willen bekennen vnd bedencken. Geben in vnser vnnd des Reichs statt Regenspurg / den sechtzehenden tag des monats Julij / Anno Tausent / Fünffhundert zway vnd dreyssig / vnsers Kaiserthumbs im zwelfften / vnd vnsers Reichs im sibenzehenden.

Anmerkungen (Wikisource)

  1. Griechisch Weißenburg = Belgrad
  2. Ibrahim Pascha (*1493, †1536), osmanischer Großwesir
  3. Proviant