Klageliche not (Mit aufgelösten Abbreviaturen)
[114r]
Klageliche not·
clage ich von der minne·
dc si mir gebot·
dc ich mine sinne·
da bewante da man mich verderben wil·
heý minnen spil·
durh dich lide ich sendes kumbers al zevil·
Wengel rosen var·
wol gestellet kinne·
ǒgen luter klar·
minneklichú tinne·
hat si dú mir krenket leben vnd lip·
hei selig wip·
dur din besten tugende mir min leit vertrip·
Svͤsse troͤsterin·
troͤste mine sinne·
dur die minne din·
in der minne ich brinne·
von der minne fúre lide ich sende not·
hei múndel rot·
wilt dv mich niht troͤsten sich so bin ich tot·