Die Schedelsche Weltchronik (deutsch):267

 

266 <<<Vorheriges Blatt	Die Schedelsche Weltchronik    Blatt CCLXVII	Nächstes Blatt>>> 268
korrigiert	Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

verso:

DIe bischoflich namhaftig statt Neyss Schlesier lannds an dem fluss Neyss gelegen hat von demselben fluss iren namen empfangen vnd ist mit mancherlay gepewen geziert. Als aber Schlesier lannd vomm anfang ein teyl des grossen Hircinischen walds gantz eben gewest ist also ist es auch weldig gewest. aber durch verweylung vnd verscheynung der zeit ist es von weyl zu weyl mit do^erffern vnd menschlichen inwonungen verfangen worden. Nach dem nw aber die inwoner den cristenlichen glawben an sich empfiengen da warden stett vnd schlo^eßer auffgerichtet vnd dieselben inwoner des schlesischen lands zu gu^eettigerm vnd innigerm gotßdienst gelaytet. Durch diss Schlesier land fleu^eßt der namhaftig fluss Ader genant. derselb fluss mit Olsa Nissa Ola Lissa Barusio Bobro vnd andern flu^eßen gemert rynnet durch die Brandemburgischen marck in das teu^etsch meer bey Stettin. Schlesier land ist drey tagrays prayt vnd newn tagrays lang sich von den Hungerischen^[1] gegenten bis in die Brandemburgischen marck außstreckende. Vnd wiewol der erst bischoflich stu^ol diss lannds nicht zu Preßlaw gewest ist. yedoch als Kazimirus diss namens der erst auff absterben der ko^enigclichen manlichen stammens in Poln auß seinem clo^esterlichen stand von dem Eluniacensischen closter durch verhengknus des babsts denn er von eim yeden menschen des ko^enigreichs einen pfennig gein Rom zeschicken verhieß in Poln kome vnd zu ko^enig auffgenomen wardt do wendet er den bischoflichen stu^ol in die statt Preßlaw so dann yetzo (als ettwen hieuor in beschreybung der statt Preßlaw gemeldt ist) ein hawbt aller Schlesitischen stett ist. In demselben bischoflichen stu^ol sitzt yetzo doctor Johann rot von Wemmding Eystetter bistthumbs^[2] weylund ein kaiserlicher prothonotari. der dann beru^embt ist das er mit seiner klu^ogheit vnnd emmssigkeit das bistthumb in ku^ortzer weil zu dem stand gebracht hab das der bischoflich tisch vnd hof in hundert vergangen iaren nye fruchtperer vnd an gepewen zierlicher gewesen sey. Diss land ist an getrayd vnd fischen fruchtper. an willprett. vnd vo^egeln vberflu^esseg. Außerhalb der statt Preßlaw sinnd sunst nammhaftig beru^embt stett in disem lannd. Nemlich dise statt Neyss. gross Glogaw Lignitz Oppel Schwednitz Teschen Olsna Franckenstain Monsterberg Sagan Brega. Anch^[3] vil scho^ener wolgepawter clo^ester vnnd gotzhewßer. Diss lannd ist eim ko^enig zu Beheim vnderworffen: das hat er von dem Ro^emischen reich zu lehen. Vil erblich hertzogen vnnd fursten haben diss lannd verherert verwu^eestet

recto:

Blat CCLXVII

vnnd vnfridsamm gemacht das sie von spro^edigkeit vnnd wenigkeit wegen der zinss vnnd rennt fu^erstlichen stand nicht fu^eeren mo^echten. darumb ergaben sie sich auff rawberey. Aber nw zurzeit ist diss lannd auff absterben der andern geschlecht an wenig herren gelangt die dann nicht wenig mit reichthu^emern vnd bewarten stetten begabt sind. Der gotßdienst ist durch das gantz Schlesier land fast vil vnd gross. so sind die gotzhewßer allenthalben mit briesterlichen vnd andern gezierden vnnd gepewen hohgeeret. Der gaistlichen beder geschlecht ein große anzal. vnd erbers zu^echtigs lebens. das volck redsprechig vnd holdselig vnd vber alle inwoner teu^etschs lannds zu der andacht hohgeflißen. Alda ist auch vil adels zu waffen vnnd kriegen begierig. Das weiplich geschlecht hu^ebsch und lu^estig. aber zu^echtig. Das pewrisch gepo^efel polnischer sprach der feld arbait treglich wartende ist mer geflißner zumm getranck. darumb wonen sie in schno^eden hewßlein vnd werden ire feld vnnd egker versewmlich gepawt. aber die Teu^etschen pawrn pflegen irs feldpaws fleißigclicher vnd wonen auch in zierlichern herbergen. Alda ist die zerung vil wolfayler dann in andern anstossenden gegenten. Aber was dem Schlesier land ettwen vnu^eberwindlichen schaden vnd abbruch bringen wirdt das ist das. das die zinss herren nach gestalt der statt vnd des besitzers mit verwilligung der o^eberkeit ein nemliche summa gelts nemen vnd dem verkawffer einen ierlichen zinss auff seine gu^eeter schreiben. vnd so sie denn solchen zinss ettwieuil iar bezalen darnach so widersetzen sie sich den zegeben. alßdenn werden die pawrn nach innhalt des gedings eintweders mit gaistlichem pann angezogen. oder aber die pfand angegriffen. vnd so denn die pawrn solche beschwernus nit erleyden mu^ogen so verlassen sie haws vnd feld vnd fliehen anderßwohin also komen derselben ho^efe. feld. wysen vnd egker zu vngepew vnd bleyben in eegerten ligen. Auß disem fal nymbt Schlesier land (wo es nit fu^ersehen wu^erdt) teglich grossen abbruch. sunst ist es ein lo^eblichs land. Des volcks getranck ist pier. Auß Merheren^[4] vnnd Hungeren^[5] bringt man wein dahin. wiewol man ettlichen wein in der Schlesi bey Crosna hat. den man zumm maisten tayl auß dem land auff der adern gein Preu^essen vnd anderswohin bringt. Sunst fu^eert man nichtz auß dem Schlesier land dann spro^ede wu^elline tu^echer gein Hungern. vn fisch^[6] gein Merheren. Der zeuil gross geschmuck vnnd zier de der klaider an iunckfrawen vnd weybern von gold vnnd petlein saygert diss land nicht wenig.

Neyss

NISSA

---

1. = Ungarn
2. Bischof Johann IV. Roth aus Wemding im Bistum Eichstätt
3. Druckfehler: Auch?
4. Auflösung Merherñ nach Merheren = Mähren
5. Auflösung Hungerñ nach Hungeren
6. „sisch“ = offensichtlicher Druckfehler