Die Schedelsche Weltchronik (deutsch):087

 

086 <<<Vorheriges Blatt	Die Schedelsche Weltchronik    Blatt LXXXVII	Nächstes Blatt>>> 088
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

LXXXVI verso:

Das funft alter

Florencia die edel vnd fu^ernamste statt vnder den stetten Etrurie wirdt irs vrsprungs halben auff die zukunft der Sillanischen ritterschaft (den dieselb gegent von Silla dem ro^emischen ratherrnn zugeaigent wardt) gezogen. vnd nachdem sie sich erstlich daselbst bey dem fluss Arni nider gesetzt haben. So maynen ettlich das dise statt von dem fluss erstlich fluencia genant worden sey. Dann plinius (der erstlich von demselben end meldung tu^ot) heißt dieselben lewt Fluentiner. als bey dem fu^erfließenden Arno wonende. Nw sind dieselben ritterschaften daselbsthin komen. nach erpawung der statt Rom. vi^c. lxvij. iar. Auß dem erscheint das dise stat bey. lxxxiij iarn vor zukunft cristi vnßers gottes einen anfang gehabt hat. Dise statt Florencia ist von den Fesulianernn an den gestadt des fluss Arni gepawen. vnd die alten haben sie Fluenciam gehaißen. nach dem sie aber an glu^ecksaligem wesen vnd zugefalligen dingen andere stett in der nachtpawrschafft daselbstumb gelegen zeu^ebertreffen. vnd irnn gewalt kraft vnnd vermu^egen wunderperlicher weiß zeerpraiten begunde. so ist dise statt vil billicher Florencia. als ein plu^eende. dann Fluencia ein fließende genant. Dise statt ist zu den zeiten der Gotier mit vil beschwerden angefochten worden. dann Totila het sie verheeret vnd verwu^estet. die doch der groß Karolus widerauffrichtet vnd mit eim gro^essern vmbkrais vnd zinnen einfienge vnd mit loblichen freiheiten vnd burgerlichen rigimenten begabet. Als aber Florencia mit gewalt vnd sunst die Fesulanier an sich bracht. nach der gepurt Cristi tausent vnd in dem. xxiiij. iar hat sie an reichthu^emern vnd eren fast zugenomen. Desselben iars hat keiser Henrich der erst sancti Miniatis kirchen bey der mawr zu Florentz gepawen. Von derselben zeit her ist die statt durch die vordern der kunst vnd panyertrager der gerechtigkeit. die man zu latein priores arcium et vexillifferos iusticie nennt. als yetzo bischiht geregirt worden. In diser statt sind außerhalb andrer vnglewplicher zierden ein beru^ombter thumbkirch. mit eim wunderwirdigen schwinbogen oder gewelb gezieret. vnd in der ere der hohgelobten gloriwirdigen iunckfrawen Marie geweyhet. darnach imm vierden iar wardt ein hoher pallast. darinn die vo^erdern des regiments wonen zepawen angefangen vnd nach

LXXXVII recto:

Blat LXXXVII

der werlt

folgend imm fu^enften iar. das ist das j^m. lxxi. iar nach cristi gepurt ein pawmgart gepflantzt. die statt an zinnen erweytert vnd vber sand Lorentzen kirchen an dem getadt des fluss mit ewigem vmbgang gelaytet. vnnd darnach im xxxi. iar ein ko^estlicher marmorsteininer glocken thurn auffgerichtet. alda dann der zaiger finger des vorlawfers cristi in großer ererbietung gehalten wirdt. in des ere ein ko^estlicher tempel. den sie baptisterium nennen. an eim gelegnern ende der statt geweihet ist. daran die thore von fester glocken speiß oder ertze gemacht. vnnd die historien des neven vnd alten testaments mit vnaußsprechlichem werck darein ergraben sind. vnd nachdem aber Florencia ein plu^om aller welschen stett genant wirdt. so hat sie außerhalb irer hu^ebscheit vnnd irer burger holdseligkeit. auch man in allem geslecht oder tugend fu^ertreffenlich gehabt. nemlich zwen poeten Dantem aldegerium vnd Franciscum petrarcham. Item vnlang darnach Jothum den hohberu^emsten maler in kunst Appelli dem preyßwirdigen maler wol zegleichen. Item Accursium den fu^ersten der rechtgelerten. vnd einen fu^erpu^endigen außleger der werltlichen recht. Item Tadeum einen hohberu^embten artzt. Item Cosmum medicum. der an zuflu^essigkeit der reichthu^emer holdseligkeit vnd miltigkeit alle burgere in Europa vbertroffen hat. sein su^en vnd enigklein sameln auch nochmaln sein glu^ecksaligkeit. die dann auch der statt Florentz vil zierde zugelegt haben. vnd sunderlich ein lo^eblich closter sancti Marci darinn scho^ene gepew vnd ein librarey. die andern all vbertreffende. Das feld darinn Florencia ligt tregt fast gu^oten wein. die fu^ersichtigkeit der Florentiner ist in vil dingen loblich vnd preyßlich. vnnd sunderlich in außerlesung irer cantzler vnd schreiber. dann des sind sie hohgeflißen allweg zeerwelen vnd bey ine zehaben die ihenen die in erfarung weißheit vnd kunst des gedichtes vnd wolredens vor andern hohberu^embt. gelert. geu^ebt vnd fu^ertreffenlich sind. demnach haben sie ettwen Leonhardum vnnd Karolum die Aretiner. auch Poggium. vnnd vor denselben Collucium bey ine gehabt. die von art des schreibens vnd dichtens außpu^endig gewesen sind.

Florentz

---